អ្នកទាំងពីររកបានគ្រាប់បាល់សរុប​ច្រើនជាង២០០គ្រាប់ដូចគ្នាក្នុងអាជីពដ៏ជោគជ័យ ប៉ុន្តែវីរបុរសអាល្លឺម៉ង់ Miroslav Klose បានសរសើរប្រធានក្រុមប៉ូឡូញនិងជាខ្សែប្រយុទ្ធ Bayern Munich បច្ចុប្បន្ន Robert Lewandowski ថាជាកីឡាករដែលល្អជាងលោកដល់ទៅ១០ដង។

លោក Klose ដែលជាពូជពង្សអាល្លឺម៉ង់តែកើតនៅប៉ូឡូញ រកបាន១២១គ្រាប់ក្នុងការលេងសរុប៣០៧ប្រកួតក្នុងក្របខ័ណ្ឌ Bundesliga សម្រាប់ Kaiserslautern, Werder Bremen និង Bayern Munich ពីឆ្នាំ១៩៩៩ដល់២០១១ មុនទៅ​ចូល​រួម Lazio ដល់​ចូល​និវត្តន៍​ក្នុង​ឆ្នាំ​២០១៦​ ខណៈ Lewandowski រកបាន២១៣គ្រាប់ពី២៩៧ប្រកួតមក​ទល់​ពេលនេះ​ តែខណៈគេកំពុងប្រកបអាជីពនិងនៅល្អនៅឡើយ ច្បាស់ណាស់ថាតួលេខគ្រាប់បាល់របស់គេនឹងកើនឡើងថែមទៀត។ បើសរុបគ្រប់ពានសម្រាប់ក្លិប Lewandowski រកបានសរុប៣០៩គ្រាប់រួចទៅហើយតាំងពីលេងឱ្យ Dortmund រហូតដល់ Bayern ក្រោយផ្លាស់ពីក្លិបប៉ូឡូញ Lech Poznan មកអាល្លឺម៉ង់ក្នុងឆ្នាំ២០១០មក។

ថ្វីបើតួលេខគ្រាប់បាល់ក្លិប Klose រកបានតិចជាង Lewandowski តែនៅក្រុមជម្រើសជាតិវិញ Klose ល្បីល្បាញខ្លាំង ហើយលោកគឺជាម្ចាស់ឯតទគ្គកម្មរកបានគ្រាប់បាល់ច្រើនបំផុតក្នុងជុំផ្ដាច់ព្រ័ត្រ World Cup ដោយរកបាន១៦គ្រាប់ពីការបង្ហាញខ្លួន៤ព្រឹត្តិការណ៍។ លោករកបានសរុប៧១គ្រាប់ពីការលេង១៣៧លើកសម្រាប់អាល្លឺម៉ង់ពីឆ្នាំ២០០១ដល់២០១៤ និងបានឈ្នះពាន World Cup 2014, រងជើងឯកឆ្នាំ២០០២ និងរងជើងឯក Euro 2008។

ទោះបីមានស្ថិតិគួរឱ្យសរសើរបែបនេះក្ដី លោក Klose ដែលសព្វថ្ងៃជាគ្រូបង្វឹក U18 Bayern និយាយដាក់ខ្លួនមួយទំហឹងតែម្ដង ដោយប្រាប់សារព័ត៌មាន Bild ថា៖ «Robert Lewandowski លេងដូចខ្ញុំតិចតួច ប៉ុន្តែគាត់ល្អជាងខ្ញុំ១០ដង។ គាត់ជាខ្សែប្រយុទ្ធល្អគ្រប់ជ្រុងជ្រោយ គាត់ប្រើជើងទាំង២បានល្អ, ខ្លាំងបាល់លើ និងស៊ុតយ៉ាងអស្ចារ្យ»។

គួរជម្រាបថា Lewandowski វ័យ៣១ឆ្នាំកំពុងឈរលេខរៀងទី៤ក្នុងបញ្ជីអ្នករកគ្រាប់បាល់បានច្រើនបំផុតក្នុងប្រវត្តិសាស្ត្រ Bundesliga នៅក្រោម Gerd Muller, Klaus Fischer និង Jupp Keynckes៕

ប្រែសម្រួល៖ គជសារ
ប្រភព&រូបថត៖ Bild