+855 16 757 168     samnob@keiladaily.com
KD Logo

ចំបាប់​កម្ពុជា​ ជួប​កង្វល់​ខ្សត់​អាជ្ញា​កណ្ដាល​កម្រិត​អន្តរជាតិ​ ទោះ​ខ្លាំង​នៅស៊ីហ្គេម​

ទាញយក App វិបសាយកីឡាដេលី នៅក្នុងទូរស័ព្ទដៃរបស់អ្នក

PlayStore AppStore
| 471
អគ្គលេខាធិសហព័ន្ធកីឡាចំបាប់កម្ពុជាលោក ធិន វិចិត្រ បង្ហើបកង្វល់ថា ចំបាប់កម្ពុជាបច្ចុប្បន្ននេះ មិនទាន់មានមន្ត្រីបច្ចេកទេស ឬអាជ្ញាកណ្ដាលអន្ត​រជា​តិ​​នោះទេ បើទោះ ចំបាច់ ជាកីឡាដ៏មានសក្ដានុពល តែងបង្កើតជោគជ័យបន្តបន្ទាប់ឲ្យកម្ពុជាលើឆាកស៊ីហ្គេម។

ស៊ីហ្គេម ស្ទើគ្រប់សម័យចាប់ពី ២០០៣ មក ចំបាប់ ឈ្នះមេដាយពុំដែលខានឡើយ។ គួរឲ្យកត់សម្គាល់ស៊ីហ្គេម២០១៣ នៅមីយ៉ាន់ម៉ា ចំបាប់ បានឈ្នះមេដាយរហូ​ត​​១​០គ្រឿង រាប់ទាំងមេដាយមាស៤ផង ដោយបានធ្វើឲ្យកីឡាមួយនេះ ត្រូវចាត់ចូល ចង្កោមកីឡាដ៏មានសក្ដានុពលសម្រាប់កម្ពុជា។ ប៉ុន្តែទន្ទឹងភាពខ្លាំងបច្ចុ​ប្ប​ន្ន ចំបាប់កម្ពុជា ពុំទាន់មានមន្ត្រីអាជ្ញាកណ្ដាលនិងចៅក្រមកម្រិតអន្តរជាតិនៅឡើយ ដែលជាកង្វល់កំពុងប្រឈម។ នេះជាការលើកឡើងរបស់លោក ធិន វិចិ​​ត្រ អគ្គលេខាធិការសហព័ន្ធកីឡាចំបាប់កម្ពុជា«ត្បិតយើងយកបានមេដាយសឹងគ្រប់ស៊ីហ្គេម។ តាំងពីស៊ីហ្គេម២០០៣ ម៉ោយើងបានរហូត ប៉ុន្តែនៅ​តែប​ង​ប្អូ​ន អត់ទាន់ស្គាល់ថាចំបាប់ជាស្អីនៅឡើយ។ សូម្បីកីឡាករយើងក៏មានតាមតំបន់ ដូចកីឡាករយើងភាគច្រើនមកពី វិហារសួគ៌។ ដល់ចឹងអត់សូវគេស្គា​ល់​ច្រើន ទោះយើងចង់អញ្ជើញអ្នកចង់ចេះអាជ្ញាកណ្ដាលមករៀនក៏គេអត់ចង់ដែរ ព្រោះរៀនហើយ អត់មានសកម្មភាព អត់អីចឹងអត់ចំណូល។ ចឹងឥឡូវយើងខ្វះ​ណា​ស់ខាងបច្ចេកទេសហ្នឹ»។

អគ្គលេខាធិការរូបនេះបន្តថា ស្ថានភាពដែលចំបាប់កម្ពុជា ពុំមានមន្ត្រីបច្ចេកទេស និង អាជ្ញាកណ្ដាលអន្តរជាតិ ជាក្ដីបារម្ភ ពិសេសក្នុងកម្មវិធីអន្តជាតិ។ លោ​ក​ថាកីឡាករកម្ពុចាញ់ប្រៀបដៃគូ ឬរងនូវការកាត់សេចក្ដី លំអៀង ក្នុងកម្មវិធីមានតែអាជ្ញាកណ្ដាលប្រទេសផ្សេងៗនោះ។ លោកពន្យល់ទៀតថាសូម្បីអាជ្ញាកណ្ដាលថ្នាក់ជាតិក៏ចំបាប់ ខ្សត់ខ្សោយដែរ។

ដំណោះស្រាយបន្ទាន់លោក ធិន វិចិត្រ បន្ថែមថា ក្នុងឆ្នាំ២០១៦នេះ នឹងជម្រុញឲ្យអាជ្ញាកណ្ដាលកម្ពុជាហោចណាស់ ៥នាក់ឡើងដល់កម្រិតអន្តរជាតិជាលើកដំបូ​ង អាចបំពេញការងារក្នុងប្រកួតធំៗបាន។

គួររំលឹកថាសព្វថ្ងៃនេះ កម្ពុជាមានតែអតីតអត្តពលិកជើងចាស់២នាក់ប៉ុណ្ណោះ ធ្លាប់ឆ្លងកាត់ការបណ្ដុះបណ្ដាល និងកាន់វិញ្ញាបនប័ត្រអាជ្ញាកណ្ដាលអន្តរជាតិ គឺ​ឯកឧត្ដម វ៉ាត់ ចំរើន ដែលបច្ចុប្បន្នជាអគ្គលេខាធិការ NOCC និង លោក ហុក ឈាងគីម កំពុងកាន់តួនាទីអគ្គលេខាធិកសហព័ន្ធកីឡាល្បុក្កតោ៕

ផ្ដល់សិទ្ធ ៖ ទូរទស្សន៍ PNN
អ​ត្ថបទ និង រូបភាព៖ ប៉ែន សុផាន់ណា

សូមប្រិយមិត្តជួយ Subscribe ឆានែលយូធូបរបស់យើងខ្ញុំផង៖